उद्योग मन्त्रालयले एकै पटक ३१ कर्मचारीको सरुवा गरेको छ । मन्त्रालयले कार्यालय सहयोगीदेखि उपसचिव तहका गरी ३१ कर्मचारीको एकै लटमा सरुवा गरेको हो । यसरी सरुवामा परेका कर्मचारीहरुमाथि विभागीय कारवाही गर्नुपर्ने थियो तर मन्त्रालयले अन्यन्त्र सरुवा गरेर चोख्याउन खोजेको छ । मन्त्रिपरिषद् कार्यालयले विभागीय कारबाही गर्न दिएको निर्देशन समेत अटेर गर्दै उद्योग मन्त्रालयले ३१ कर्मचारीलाई कारबाही भन्दै सरुवा गरेको हो ।
बिज्ञापन
उद्योग वाणिज्य तथा आपूर्ति मन्त्रालयले सोमबार कम्प्युटर निर्देशकसहित कर्मचारीलाई सरुवा गरेको हो । सरुवामा परेकाहरुमा शाखा अधिकृत, नायब सुब्बा, कम्प्युटर अपरेटर तथा कार्यालय सहयोगीसहित ३१ जना कर्मचारीहरु रहेका छन् । कार्यालयको सिस्टम डाउन गरी सेवाग्राहीसँग खुलेआम घुस असुल्ने ती कर्मचारीहरुलाई कारवाही नगरी सरुवा गरेर चोख्याउने खेल सुरु भएको हो ।
बिज्ञापन
यी कर्मचारीको मिलेमतोमा सेवाग्राहीको काम समयमा नगरेको तथा स्वचालित कम्प्युटर प्रणालीमा प्रविष्ट भइसकेको फाइलसमेत सदर नगरेको भन्ने गुनासो आएपछि प्रधानमन्त्री तथा मन्त्रिपरिषद् कार्यालयको गत असार २७ गतेको निर्णयअनुसार सहसचिवको नेतृत्वमा छानबिन समिति समेत गठन भएको थियो । सोही छानबिन समितिको प्रतिवेदनका आधारमा उनीहरुको सरुवाको निर्णय भएको हो ।
‘सो सिफारिस समितिको सिफारिस प्रतिवेदन समेतका आधारमा कम्पनी रजिस्ट्रारको कार्यालयमा कार्यरत कम्प्युटर निर्देशक, शाखा अधिकृत, नायब सुब्वा, कम्प्युटर अपरेटर तथा कार्यालय सहयोगीसहित जम्मा ३१ जना कर्मचारीहरूलाई कम्पनी रजिस्ट्रार कार्यालयबाट अन्यत्र निकायमा कामकाज गर्न खटाइएको मन्त्रालयले जनाएको छ ।
बिज्ञापन
